നീലാംബരിയുടെ ലോകം-3

Painting done by Mopasang Valath (Source: facebook)

Previous part 2

റോഡിൽ നിന്ന് നോക്കിയാൽ വയലിനക്കരെ തഴച്ചു വളരുന്ന തൊടിയിലെ മരങ്ങൾക്കിടയിലൂടെ ഒരു വെള്ള പോലെ കാണൂ , അത് വീടാണ് എന്ന് പെട്ടെന്ന് മനസിലാകില്ല.പടിക്കെട്ടുകൾ കയറി മുറ്റത്തേക്ക് ചെല്ലുമ്പോൾ രാവിലത്തെ വെയിലിൽ പനമ്പായിൽ നെല്ല് ഉണക്കാൻ ഇടുകയാണ് ‘അമ്മ . എന്നത്തേയും പോലെ ഒന്ന് കൂകി . ഈ കൂകൽ പണ്ട് തൊട്ടേ ഉള്ളതാ, ഞാൻ പുറത്തു പോയിട്ടു വീട്ടിൽ എത്തി എന്നതിന് വീട്ടുകാർക്ക് ഉള്ള എന്റെ അറിയിപ്പ് (മുന്നറിയിപ്പ് എന്ന് പറയുന്നതാവും കുറച്ചുകൂടി ശരി) ആണ് . എന്റെ ഹാൾമാർക് മുദ്രയാണത് . എന്നെ കണ്ടപാടെ അമ്മയുടെ മുഖത്ത് പുഞ്ചിരി വിടർന്നു. ഇവിടുത്തെ കാരണവർ, അതായത് എന്റെ പിതാശ്രീ പുറത്തു പോയിരിക്കുകയാണ് എന്ന് അറിയാൻ കഴിഞ്ഞു. അമ്മമ്മ വർഷാവർഷം ഉള്ള അമ്മാവന്റെ വീട് സന്ദർശനത്തിനും.

വീടിനു പുറമെ വലിയ മാറ്റം ഒന്നുമില്ല.വെള്ള പൂശിയതു മങ്ങി തുടങ്ങി. കിളികളുടെയും അണ്ണന്റെയും ബഹളത്തിൽ കാര്യമായ മാറ്റം ഒന്നും ഇല്ല. മുറ്റത്തേക്ക് വെയിൽ വീണു തുടങ്ങി. എന്നെ കണ്ടടത്തും പുറംപണിക്കു നിൽക്കുന്ന കൊങ്ങി അടുക്കൽ വന്നു വെളുക്കെ ചിരിച്ചു സുഖ വിവരം അനേഷിച്ചു. അവരുടെ സഹായം അമ്മയ്ക്ക് വലിയ ആശ്വാസമാണ്. അമ്മയുടെ “പി. എ.” എന്നാണു ഞങ്ങൾ കുട്ടികൾ അവളെ കളിയാക്കാറ്. അവളുടെ ഭർത്താവ് ചെല്ലാൻ ആണ് വീട്ടിൽ അച്ഛന്റെ കൃഷി സഹായി. മുറ്റത്തു അങ്ങു ഇങ്ങായി കോഴികൾ അമ്മയുടെ തിരോധാനം നോക്കി നിൽക്കുന്നത് അമ്മയ്ക്ക് അറിയാം. നെല്ല് നോക്കാൻ അമ്മ കൊങ്ങിയെ ഏൽപ്പിച്ചു. വേഗം വൃത്തിയായി വരൂ …യാത്ര ക്ഷീണം ഉള്ളതല്ലേ, കാപ്പി എടുത്തു വയ്ക്കാം എന്ന് പറഞ്ഞു അമ്മ എന്നെയും കൊണ്ട് അകത്തേക്ക് കയറി. അമ്മ അടുക്കളയിലേക്കും ഞാൻ മുകളിലെ എന്റെ സ്വന്തം സാമ്രാജ്യത്തിലേക്കും നടന്നു.